嘩！九七來了

九七快到，我係指今年九月七日的立法會選舉，收埋一大堆刋物，其實，都唔會睇，先入為主的感覺主導一切，真係唔睇都心中有數，知道自己選邊個。

刋物有D仲好古老，講政綱，講真，又唔係執政，你真係想點就可以點咩？所以，亦有好多改左唔講咁多，sell 下形像講下大原則就算。

從設計角度講，花錢最多最有元素，睇落又順眼有三份，就係佢地：

民健聯似樓盆、自由黨似公司年報、龐愛蘭似雜誌，設計、用色、留白都有一手，一定是出自大公司經驗豐富設計團隊。

其他的有水準之作，包括有劉慧卿以半邊面示人的設計，不過用色太搶，可能是前綫公司顏色黃色之禍，文字排位太盡，有設計意念，欠缺基本工夫。

公民黨就大sell溫情，以為見到電視劇海報

鄭家富最有膽色，唔寄單張，不過份野設計有板有眼，只係文字安排未夠老練，未必方便閱讀。

上面一堆都係有專業人士協助的成果，另一個講法，即係有財有勢咁話，所以比我選，係扣分。

依個李子榮份野，真係同我地在學校見D老師做果D一樣，有幾多色用幾多色，有漸變用漸變，有幾多位用幾多位....中學D教師係時係學下設計，做出泥D野靚D，學生會醒神D...

黃成智依份最似學生刋物，但係佢有五十幾歲....

最冇眼睇係下面兩份

蕭博士依份真係質勝文則野，一定連fans都唔肯睇晒，最差仲係有幾多色用幾多，大佬，四色印刷唔係得四個色，CMYK可以做晒所有色，襯下色都好掛。

長毛就犯晒所有大忌，連文字都排到水蛇春咁長，點睇呀。仲要，政績就係D好似9月12日就判佢案之類....又冇大頭靚仔相，只係有張比英武police按在地上的相。仲有，人人都CMYK，長毛應該只係雙色，專紅專黑....

點揀？

論精美程度，首推民建聯自由黨，論花錢花心思，都係民建聯，睇佢一生承諾，我以為婚禮場刋，睇佢『有人話 監察政府就要反對政府，我地相信 有效監察必先有積極建議....』就知重金禮聘左唔知邊個copywriter大家同佢地寫slow緊；不過，靚還靚，花錢還花錢，總係唔覺係真。

最差果個長毛，反而D野好真，立法議會又真係咁，你幾有理有節咁講理由又點，政府數夠數就連回應都唔回應，有保駕議員就只係重視最後投票結果，所以，都唔使太高調講自己的政綱，好似長毛咁，在法律邊緣上引起大家反响已經係最可能的一步，不過，長毛入唔入立法會又好似唔會有大分別。